देउखुरी, लुम्बिनी प्रदेशका मुख्यमन्त्री लीला गिरीकोे सरकार ढलेको छ । सोमबार दोस्रो पटक विश्वासको मत लिएका मुख्यमन्त्री गिरीले विश्वासको मत पाउन नसकेपछि सात दलको समर्थनमा मुख्यमन्त्री बनेका गिरी नेतृत्वको सरकार ढलेको हो ।
सरकार बनेको १०३ दिनमा मुख्यमन्त्री गिरी नेतृत्वको लुम्बिनी प्रदेश सरकार ढलेको छ । गत पुस २७ गते गिरी मुख्यमन्त्रीमा नियुक्त भएका थिए । सोमबार विश्वासको मतमा गिरीको पक्षमा ३३ र विपक्षमा ५३ मत परेको छ ।
मत विभाजनपछि सभामुख तुलाराम घर्तीले मुख्यमन्त्री गिरीले विश्वासको मत प्राप्त गर्न नसकेको संसदलाई जानकारी गराए ।
सत्ता साझेदार दलहरुले समर्थन फिर्ता लिएपछि सरकार बनेको ७४ दिनमै गिरी नेतृत्वको अल्पमतमा परेको थियो ।
संविधानको धारा १६८ को २ बमोजिम बनेको सरकार ढलेको छ । ८७ सांसदमध्ये लुम्बिनीमा बहुमत पुग्न ४४ मत आवश्यक पर्छ । लुम्बिनीमा एमालेको २९ र राप्रपाको ४ सांसद छन् ।
नेपाली कांग्रेस २७, नेकपा माओवादी ११, नागरिक उन्मुक्ति पार्टी ४, जसपा, लोसपा, जनमत ३–३, राष्ट्रिय जनमोर्चा र एकीकृत समाजवादी १–१, स्वतन्त्र १ गरी ५३ जना सांसदले विपक्षमा मतदान गरेका छन् ।
लुम्बिनीमा कांग्रेसका डिल्लीबहादुर चौधरीलाई मुख्यमन्त्री बनाउन माग गर्दै विभिन्न आठ दलका ५३ सांसदले प्रदेश प्रमुखलाई हस्ताक्षर बुझाइसकेका छन् ।
एमालेले भने विश्वासको मत नपाएपछि ठूलो दलका हिसाबले सरकारको नेतृत्व दावी गर्ने तयारी गरेको छ ।
एमाले संसदीय दलको बैठकमा संसदमा विश्वासको मत लिने र संविधानको धारा १६८ को ३ बमोजिम सरकार गठनका लागि पहल लिनेबारेमा समेत छलफल गरेको छ ।
यसैवीच सभामुखले आजै प्रदेश प्रमुख अमिक शेरचनलाई त्यसबारे जानकारी गराउने प्रदेशसभा सचिवालयका प्रमुख दुर्लभकुमार पालले बताए ।
उनले भने , ‘सभामुखले आज सोमबार नै प्रदेश प्रम्खलाई मुख्यमन्त्रीले विश्वासको मत ल्याउन नसकेको व्यहोरा जानकारी गराउनु हुनेछ ।’
काङग्रेस संसदीय दलका नेता डिल्लीबहादुर चौधरीले आफुहरुले प्रदेश प्रम्खलाई जानकारी गराइ सकेकाले नयाँ सरकारको प्रक्रियाको सुरु हुने बताए ।
मुख्यमन्त्री गिरीले अब संविधानको धारा १६८ (३) अनुसार नै सरकारको खोजी हुने बताए । उनले भने , ‘मेरो दावी हुने कुरा त भइहाल्यो, प्रदेश प्रमुखले कस्तो भूमिका खेल्नुहुन्छ त्यसैमा भर पर्छ ।’
प्रकाशित मिति : २०८० बैशाख ११, सोमबार १६:००
