काठमाडौं, नेपाली कांग्रेसले पुष्पकमल दाहाल नेतृत्वको सरकारलाई विश्वासको मत दिने भएको छ ।
बानेश्वरस्थित संसद भवनमा बसेको कांग्रेस कार्य सम्पादनको बैठकले सरकारलाई विश्वासको मत दिने निर्णय गरेको नेता कृष्णप्रसाद सिटौलाले बताए। कार्यसम्पादन समितिको बैठकपछि अब संसदीय दलको बैठक बस्दैछ।
संसदीय दलको बैठकमा सभापति तथा दलका नेता शेरबहादुर देउवाले दाहाल सरकारलाई विश्वासको मत दिन पार्टीमा ह्यीप जारी गर्ने भएका छन्।
त्यसअघि पदाधिकारीले सहमति जुटाउन नसकेपछि कार्यसम्पादन समितिको बैठक बसेको थियो।
२७५ सदस्यीय प्रतिनिधिसभामा १६९ सांसदले दाहाल सरकारलाई विश्वासको मत दिने भएपनि प्रतिपक्षमा बस्ने भएका छन्।
प्रधानमन्त्री दाहाल सोमबार मात्र कांग्रेस सभापति शेरबहादुर देउवालाई भेट्न धुम्बाराही पुगेका थिए । भेटमा दाहाललाई देउवाले विश्वासको मत दिने आश्वासन दिएका थिए।
कांग्रेसभित्र दाहाल सरकारलाई विश्वासको मत दिनुपर्ने पक्षमा संस्थापन पक्ष थियो। कोइराला समूह भने प्रतिपक्षमा बस्नुपर्ने अडानमा थियो।
खासगरी महामन्त्रीद्वय गगन थापा र विश्वप्रकाश शर्मा प्रतिपक्षमै बसेर शक्ति आर्जन गर्नुपर्ने पक्षमा थिए।
बिहान देउवानिवासमा बसेको पदाधिकारी बैठकमा सभापति शेरबहादुर देउवाले दाहाललाई विश्वासको मत दिने प्रस्ताव राखेका थिए ।
पदाधिकारीबीच कुरा बाझिएपछि कार्यसम्पादन समितिको बैठक डाकिएको थियो । प्रतिनिधिसभामा कांग्रेसका ८८ सांसद छन् ।
प्रकाशित मिति : २०७९ पुष २६, मंगलवार ०७:१५
