एजेन्सी, रियल म्याड्रिडलाई हराउँदै बार्सिलोनाले स्पेनिस सुपर कपको उपाधि जितेको छ । साउदी अरबको रियादमा गएराति सम्पन्न फाइनल खेलमा गत विजेता रियललाई ३–१ गोल अन्तरमा हराउँदै बार्सिलोनाले उपाधि जितेको हो ।
किङ फाद इन्टरनेसनल स्टेडियममा भएको खेलमा बार्सिलोनालाई उपाधि दिलाउन गाभी, रोबर्ट लेवान्डोस्की र पेड्रीले एकरएक गोल गरे ।
रियलका कप्तान करिम बेन्जेमाले एक गोल फर्काए । खेलको ३३ औं मिनेटमा १८ वर्षीय गाभीले रोबर्ट लेवान्डोस्कीको पासबाट गोल गर्दै बार्सिलोनालाई सुरुआती अग्रता दिलाएका थिए ।
४५ औं मिनेटमा गाभीकै पासमा लेवान्डोस्कीले गोल गर्दै बार्सिलोनालाई २–० ले अग्रता दिलाए । ६९ औं मिनेटमा गाभीको पासमा पेड्रीले गोल गर्दै खेलमा बार्सिलोनाले ३–० को फराकिलो अग्रता बनायो ।
करिम बेन्जेमाले खेलको इन्जुरी समयमा गोल फर्काए पनि त्यो म्याड्रिडको जितका लागि पर्याप्त भएन । बार्सिलोनाले पछिल्लोपटक सन् २०१८ मा सुपर कपको उपाधि जितेको थियो ।